سەرۆکی ئیسرائیل رایدەگەیەنێت، شەوێکی سەختیان بەڕێکرد و ئەمڕۆ، بەیانییەکی زۆر خەمناکە.
ئیسحاق هێرزۆگ، سەرۆکی ئیسرائیل لە تۆڕی کۆمەڵایەتیی ئێکس نووسیویەتی، “شەوی رابردوو خوشک و براکانمان لە هێرشە تاوانکارییەکانی ئێران کە خەڵکی مەدەنییان کردەئامانج، لە (بات یام و تەمرە و شارۆچکەکانی دیکە) کوژران و برینداربوون”.
دەشڵێت، لەناو قوربانییەکاندا هاوڵاتییانی “جولەکە، عەرەب، ئیسرائیلییە رەسەنەکان، کۆچبەران، منداڵان، بەساڵاچووان، ژن و پیاو” هەن.
نووسیویشیەتی، “هاوبەشی خەم و پەژارەی کەسوکاری قوربانییەکانم لەسەر ئەم کارەساتە پڕ لە ئازارە و هیوای زوو چاکبوونەوە بۆ بریندارەکان و دۆزینەوەی بێسەروشوێنبووەکان، دەخوازم”.
شەوی رابردوو، ئێران و ئیسرائیل لە هێرشکردنە سەر یەکتر بە مووشەک و درۆن بەردەوامبوون و لە ئەنجامدا، ژمارەیەکی زۆر هاوڵاتیی هەردوولا، بوونە قوربانی.
