بەرپرسانى ئیسرائیل سووربوون لەسەر پێکانى ئامانجەکان لە ئێران و پاراستنى ئیسرائیلییەکان دووپاتدەکەنەوە.
گیدۆن سار، وەزیری دەرەوەی ئیسرائیل رایگەیاند، دوو دامەزراوەی ئەتۆمیی ئێرانمان کردە ئامانج و، دامەزراوەى نەتەنز-مان بە تەواوى لەکارخست.
وتیشى، “هەڵمەت و هێرشەکانمان بەردەوامییان دەبێت، دەبێت لەگەڵ سەری مارەکەدا لە جەنگدا بین”.
وتەکانى وەزیرى دەرەوە دواى ئەو هێرشانە بوون کە بەرەبەیانى ئەمڕۆ بۆ سەر تاران و ژمارەیەک شار و ناوچەى دیکەى ئێران ئەنجامدران و بەهۆیەوە چەندین سەرکردەى سەربازى و زاناى ئەتۆمى کوژران، جگە لە تێکدانى ژێرخانى سەربازى و ئەتۆمى.
لاى خۆیەوە سوپای ئیسرائیل بڵاویکردەوە، ئاسمانی وڵاتەکەمان پارێزراوە و هیچ مووشەک و درۆنێک لە خاکی ئیسرائیل نەکەوتووتە خوارەوە، ئۆپراسیۆنی بەرپەرچدانەوەی هێرشەکانمان بەردەوامی هەیە.
هەر سەبارەت بە زیانەکانى ئێران ئەڤێجای ئادرێی، وتەبێژی سوپای ئیسرائیل رایگەیاند، دوو سەکۆی هەڵدانی مووشەک و سێ ئامڕازی هەڵدانی مووشەکی بالیستی ئێرانمان تێکشکاند.
