ئەمڕۆ سێشەممە 26ی كانونی دووەم، ڕوداوێكی هاتوچۆ لە سنووری كۆیە ڕویدا و بەهۆیەوە 9 هاوڵاتی برینداربوون.
عەقیدی مافناس- زاهیر محەمەد غەفوور، بەڕێوبەری پۆلیسی هاتوچۆی كۆیە لە لێدوانێكدا بۆ “ئێستا” وتی، “ڕوداوەكە لەنێوان دوو ئۆتۆمبیلی جۆری تۆیۆتا كرۆلادا لەسەر ڕێگەی نێوان کۆیە – تەقتەق ڕویداوە، بەوهۆیەوە 9 هاوڵاتی برینداربوون.”
بەڕێوبەری پۆلیسی هاتوچۆی كۆیە ئاشكرایكرد، “چوار لە بریندارەكان برینەكانیان سەختن و دۆخی تەندروستییان ناجێگیرە، بۆیە ڕەوانەی نەخۆشخانەی فریاكەوتنی هەولێر كراون.”
لەبارەی هۆكاری ڕوداوەكەوە، عەقیدی مافناس- زاهیر محەمەد غەفوور ڕایگەیاند، “یەكێ لەو دوو ئۆتۆمبیلە لە یوتێرنێكدا سووڕاوەتەوە و ڕۆیشتووەتە سەر سایدی بەرانبەر و ئۆتۆمبیلەكەی تر لێیداوە.”
