بەڕێوەبەرایەتیی گشتیی تەندروستیی سلێمانی رایدەگەیەنێت، لە رۆژانی جەژنی قورباندا، شەش هەزار و 374 نەخۆش سەردانی نەخۆشخانە و ناوەندە تەندروستییەكانی سلێمانییان كردووە.
بەڕێوەبەرایەتیی گشتیی تەندروستیی سلێمانی لە راگەیەندراوێکدا بڵاویکردەوە، لە رۆژانی جەژنی قوربان، دوو هەزار و 748 نەخۆش سەردانی نەخۆشخانەی ‘شار’ـیان كردووە و 688 نەخۆش داخڵكراون، 316 نەشتەرگەریی فریاكەوتن و كتوپڕ كراوە، 61 نەشتەرگەریی دیکە كراوە، هەروەها حەوت هەزار و 715 پشكنینی تاقیگەیی، 404 سۆنەر، 113 شووشتنەوەی گورچیلە و 19 قەستەرە كراوە.
دەشڵێت، لە رۆژانی جەژنی قوربان، 397 نەخۆش سەردانی ‘نەخۆشخانەی منداڵبوونی فێركاری’ـیان كردووە لە شاری سلێمانی و 84 نەخۆش داخڵكراون، 82 منداڵ لەدایكبوون كە 52 منداڵیان كوڕ بوون و 30 منداڵیان كچ بوون، لە نەخۆشخانەی د.جەمال ئەحمەد رەشیدی منداڵان، دوو هەزار و 250 منداڵی نەخۆش بینراون و 244 منداڵ داخڵكراون.
ئاماژەی بەوەشکرد، 650 نەخۆش لە بەشە جیاجیاكانی نەخۆشخانەی هیوا بینراون و پشكنین بۆ 431 نەخۆش كراوە، 16 تووشبووی نوێ تۆماركراوە، لە نەخۆشخانەی سووتاوی و نەشتەرگەریی جوانكاری 157 نەخۆش سەردانیان كردووە و نۆ نەخۆش داخڵكراون.
تەندروستیی سلێمانی ئەوەشیخستووەتەڕوو، 172 نەخۆش سەردانی سەنتەری گورچیلەی دەستكردیان كردووە و چارەسەری پێویستیان بۆ كراوە، 10 نەخۆش لە نەخۆشخانەی ئەڵمانی بۆ چارەسەری نەخۆشییەكانی كۆئەندامی هەناسە، داخڵكراون.
