تۆماس باراک، نوێنەری ئەمریکا لە سوریا رایگەیاند، واشنتن دەستیکردووە بە کەمکردنەوەی ژمارەی سەربازەکانی لە سووریا و تەنها یەک بنکەی هێزە ئەمریکییەکان دەهێڵدرێتەوە.
لە چاوپێکەوتنێکدا لەگەڵ کەناڵی ئێن تی ڤی تورکی، تۆماس باراک رایگەیاند، “ئێمە بنکەکانمان لە هەشت بنکەوە کەمکردەوە بۆ پێنج، پاشان سێ، پێدەچێت بەمنزیکانە تەنها یەک بنکە لە سووریا بهێڵینەوە”.
لەلایەکی دیکەشەوە، روانگەی سووری بۆ مافەکانی مرۆڤ دەڵێت، لەم ماوەیەی دواییدا هێزەکانی ئەمریکا دوو بنکەی ستراتیجییان لە رۆژهەڵاتی پارێزگای دێرەزۆر، بە تایبەتی کێڵگەی نەوتی ئەلعومەر و کێڵگەی غازی کۆنۆکۆ، چۆڵکردووە.
بەگوێرەی روانگەکە، هێزەکانی ئەمریکا لە 18ـی ئایارەوە، وردەوردە دەستیان بە جێهێشتنی بنکەکانیان کردووە.
