جێگرى سەرۆک وەزیران لە کۆبوونەوەى لەگەڵ بەڕێوەبەرى رێکخراوى فاو داوایکرد رێکخراوەکە لە پەرەپێدانی بەرهەمە ناوخۆییەکان و دۆزینەوەی بازاڕ لە دەرەوە هاوکاریی هەرێمى کوردستان بکات.
قوباد تاڵەبانی، جێگری سەرۆک وەزیران ئەمڕۆ پێشوازیکرد لە چو دونیو، بەڕێوەبەری گشتیی رێکخراوی FAO.
لە کۆبوونەوەکەدا قوباد تاڵەبانی سوپاسی هاوکارییە تەکنیکی و راوێژکارییەکانی رێکخراوەکە و کردنەوەی Gene Bank کە تایبەتە بە گەشەپێدانی کەرتی کشتوکاڵیی کرد و هیوای خواست لەم قۆناغەدا کە ئەولەوییەتی حکومەتی هەرێم گەشەپێدان و پێشخستنی کەرتی کشتوکاڵە، هاوکاری و پەیوەندیی نێوان رێکخراوی FAO و هەرێمی کوردستان زیاتر بەرەو پێشبچێت.
لە بەشێکی دیکەی کۆبوونەوەکەدا باس لە گەشەپێدانی ناوچەیی و بووژانەوەی ئابوریی شارۆچکەکان و گوندەکان کرا و لەم رووەوە راهێنانی پیشەیی جوتیاران و دابینکردنی نوێترین تەکنەلۆژیای کشتوکاڵی و باشترکردنی ژیان و گوزەرانی جوتیاران بە هەنگاوی پێویست و بنەڕەتی بۆ گەشەپێدانی ناوچەیی دانرا.
لە تەوەرێکی دیکەی کۆبوونەوەکەدا باس لە پڕۆژەی گەشتوکاڵ کرا کە لەلایەن جێگری سەرۆک وەزیرانەوە راگەیەندراوە و هەردوولا هاوڕابوون لەسەر گرنگیی پێشخستنی گەشتوکاڵ لەپێناو رەخساندنی هەلی کاری زیاتر و پێشخستنی هەردوو کەرتی گەشتیاری و کشتوکاڵ و هەمەجۆرکردنی سەرچاوەکانی داهات و گەشەپێدانی ناوچەیی.
سەبارەت بە پەرەپێدانی بەرهەمە ناوخۆییەکان و دۆزینەوەی بازاڕ لە دەرەوەی هەرێم، جێگری سەرۆک وەزیران بە گرنگیزانی سوود لە ئەزمونی رێکخراوی FAO وەربگیرێت و داوایکرد رێکخراوەکە لەمبارەیەوە زیاتر هاوکاربێت.
کۆبوونەوەکە بە ئامادەبوونی دارا رەشید، وەزیری پلاندانان و بێگەرد تاڵەبانی، وەزیری کشتوکاڵ و سەرچاوەکانی ئاو بەڕێوەچوو.
