بەڕێوەبەری بەرگریی شارستانیی سۆران رایدەگەیەنێت، تائێستا گەڕان بەدوای تەرمی ئاڤێستا یوسف بەردەوامە و هیچ سەرەداوێک نەدۆزراوەتەوە.
کاروان میراودەلی، بەڕێوەبەری بەرگریی شارستانیی سۆران لە لێدوانێکدا بە تۆڕی میدیایی ئێستای راگەیاند، “ماوەی مانگێک و 20 رۆژە بەبێ پچڕان بەردەوامین لە گەڕان بەدوای تەرمی ئاڤێستا یوسف و هەتاوەکو مانگێک و 10 رۆژی دیکەش بەردەوامدەبین”.
وتیشی، رۆژانە لە کاتژمێر 05:00ـی بەیانییەوە هەتاوەکو 07:00ـی ئێوارە، تیمەکانمان بەدوای تەرمی مامۆستا ئاڤێستادا دەگەڕێن و لەئێستاشدا هەشت تیممان لە پرۆسەی گەڕاندان.
ئاماژەی بەوەشدا، “جگە لە تەرمی ئاڤێستا یوسف، لەئێستادا بەدوای تەرمێکی دیکەشدا دەگەڕێین کە لە نزیک تورکیا خنکاوە و گوماندەکرێت، رووبار تا نزیکی سنووری قەزای سۆرانی هێنابێت”.
سەرەتای مانگی رابردوو، ئاڤێستا یوسف لەگەڵ خێزانەکەیدا لە شاری هەولێرەوە بەمەبەستی گەشت و سەیران روویان لە سنووری مێرگەسۆر کردبوو، دوای ئەوەی براکەی کەوتبووە ئاوی رووباری تەنگاتوور، رزگاریکرد، بەڵام خۆی لە ئاوەکەدا خنکا.
