ئێوارەی ئەمڕۆ قوباد تاڵەبانی بە مەبەستی “چەسپاندنی ڕێككەوتنی نێوان هەرێم و بەغداد”، بەرەو پایتەختی عێراق بەڕێكەوت.
لە ڕاگەیەندراوێكدا نوسینگەی ڕاگەیاندنی جێگری سەرۆكی حكومەتی هەرێم ڕایگەیاندووە، “قوباد تاڵەبانی، جێگری سەرۆكی ئەنجومەنی وەزیران و سەرۆكی وەفدی دانوستانكار، ئێوارەی ئەمڕۆ دووشەممە 25ی كانونی دووەم، بەرەو بەغداد بەڕێكەوت”.
لە ڕاگەیەندراوەكەدا ئەوەش خراوەتەڕوو، “مەبەستی سەردانەکە، چەسپاندنی ڕێككەوتنی مانگی 12ی 2020ی نێوان حكومەتی ھەرێمی كوردستان و حكومەتی فیدڕاڵە لەسەر پڕۆژەیاسای بودجەی 2021، كە تیایدا پشكی ھەرێم بە 12.67٪ دیاریكراوە”.
ئاماژە بەوەشكراوە، “لەئێستادا لیژنەی دارایی ئامادەكاری دەكات بۆ ئەوەی ئەو پڕۆژەیاسایە لە ئەنجومەنی نوێنەران بخرێتە دەنگدانەوە بەمەبەستی پەسەندكردنی”.
