سەرۆکی ژووری بازرگانی و پیشەسازیی سلێمانی رایدەگەیەنێت، داوایان لە کۆمپانیاکان کردووە، فشار دروستبکەن بۆ کردنەوەی فڕۆکەخانەی نێودەوڵەتیی سلێمانی.
نەوزاد غەفور، سەرۆکی ژووری بازرگانی و پیشەسازیی سلێمانی لە کۆنگرەیەکی رۆژنامەوانیدا رایگەیاند، لە هەوڵداین کە بتوانین چ لە دەرەوەی هەرێم، چ لە عێراق و وڵاتانی تر، سەرنجی وەبەرهێنانی بیانی رابکێشین بۆ شاری سلێمانی.
وتیشی، قەبارەی بازرگانی لەنێوان تورکیا و هەرێم، زیاترە لە 10 ملیار دۆلار و لەنێوان تورکیا و عێراقیش، سەروو 25 ملیار دۆلارە.
ئاماژەی بەوەشکرد، “هەوڵمانداوە لە داهاتوودا پتەوکردنی پەیوەندییە بازرگانییەکان، ببێتە فاکتەرێک کە کێشە سیاسییەکانیش بڕەوێنێتەوە، کە یەکێک لەو کێشانە، کردنەوەی فڕۆکەخانەی نێودەوڵەتیی سلێمانییە”.
نەوزاد غەفور ئەوەشی وت، “داوامانکردووە ئەو بازرگان و کۆمپانیایانە، لەگەڵ حکومەتی تورکیا فشارێک دروستبکەن تا ئەو کێشە سیاسییانە نەبنە رێگر لەبەردەم پەیوەندییەکان”.
