وتەبێژی بەڕێوەبەرایەتیی گشتیی حەج و عومرەی کوردستان رایگەیاند، ” سیمکارتی ئینتەرنێت و پەیوەندیی بێبەرامبەر پێشکەش بە حاجییان دەکرێت”.
کاروان ستونی، وتەبێژی بەڕێوەبەرایەتیی گشتیی حەج و عومرەی کوردستان رایگەیاند، “ئەمساڵ خزمەتگوزارییەکی دیکە پێشکەش بە حاجیان دەکرێت ئەویش دابینکردنی سیمکارتی ئینتەرنێت و پەیوەندیی بەخۆراییە بۆ هەموو حاجییانی کوردستان، ئەم هەنگاوە لە ئەنجامی هەماهەنگی و پەیوەندیی توند و توڵی سەرۆکی وەفدی حاجییانی کوردستان نیاز راغب نەقشبەندی، لەگەڵ دەستەی باڵای حەج و عومرەی عێراقییەوە هات بەمەبەستی زیاتر خزمەتکردنی حاجییان و هاوکاریکردنیان”.
کاروان ستونی وتیشی، “بە پێی گرێبەستێک لە گەڵ دوو کۆمپانیای سعودی کراوە، هەر حاجییەک سیمکارتێکی ئینتەرنێتی پێدەدرێت کە پێنج گێگابایت ئینتەرنێت و 120 خولەک پەیوەندی لەخۆدەگرێت بە خۆڕایی لە دەروازەی عەرعەر بە حاجیانی گەشتی وشکانی و لە شاری مەککەی پیرۆزیش بۆ حاجییانی گەشتی ئاسمانی دەدرێت “.
بەڕێوەبەرایەتیی گشتیی حەج و عومرەی کوردستان داوا لە هەموو ئەو هاوڵاتییانەی کوردستان دەکات کە ئەمساڵ ناویان بۆ پرۆسەی حەج دەرچووە لەکاتی گەیشتنیان بۆ سعودیە سیمکارت مەکڕن، چونکە بەخۆڕایی بۆیان دابینکراوە.
وتەبێژی بەڕێوەبەرایەتیی گشتیی حەج و عومرەی کوردستان، دەشڵێت، “سەرەڕای دابینکردنی سیمکارتی ئینتەرنێت و پەیوەندی بۆ حاجیان بۆ هەر پاسێکی حاجییان بە رێگای وشکانی راوتەرێکی ئینتەرنێت دابیندەکرێت کە 30 حاجی دەتوانن سوودی لێببینن”.
