ئەندامێكی لیژنەی دارایی لە ئەنجومەنی نوێنەرانی عێراق رایدەگەیەنێت، لیژنەی دارایی ئەنجومەنی نوێنەرانی عێراق بە میوانداریی وەزیری كارەبا و وەفدێكی وەزارەتەكە كۆبووەوە و ئامانجی كۆبوونەوەكە بەرهەمهێنانی وزەی كارەبا و رێكارەكانی كۆكردنەوەی داهات و چەند پرسێكی دیكە بووە.
د. نەرمین مەعروفـ، ئەندامی لیژنەی دارایی لە ئەنجومەنی نوێنەرانی عێراق رایگەیاندن ئەمڕۆ شەممە كۆبوونەوەی لیژنەی دارایی بە میوانداریی وەزیری كارەبا و وەفدێكی وەزارەت كۆبووەوە و ئامانج لە كۆبوونەوەكە بۆ بەدواداچوونی ئاستی جێبەجێكردنی پلانەكانی وەزارەتی كارەبابوو لە بەرهەمهێنانی وزەی كارەبا و پێشكەشكردنی خزمەتگوزاريی بە كەرتە جیاوازەكان بوو.
وتیشی، “لە كۆبوونەوەكەدا بڕی داهاتی كارەبا لە كۆی داهاتی نانەوتی و رێكارەكانی كۆكردنەوەی داهات و بەستنی پێوەری زیرەك و پارەدانی ئەلیكترۆنی و چەند پرسێكی دیكە پەیوەندیدار بە داهاتەكان تاوتوێكران.
