بەڕێوەبەرایەتیی تەندروستیی راپەڕین رایدەگەیەنێت، بەهۆی سەرپێچییەوە، چەند دەرمانخانە و نۆرینگەیەک سزادران و داخران.
لە راگەیەندراوێکی بەڕێوەبەرایەتیی تەندروستیی راپەڕیندا هاتووە، “رۆژی چوارشەممە، بەشی پشكنین و بەدواداچوون، بە ئامادەبوونی نوێنەری سەندیكا پەیوەندیدارەكان و نوێنەری دەزگای ئاسایش، چەند دەرمانخانە و نۆرینگەیەکی تەندروستی و كلینیكی ددان و تاقیگەی پزیشكی كەرتی تایبەتی لە سنوری قەزای حاجیاوا بەسەركردەوە”.
دەشڵێت، دوای پشكنین و بەدواداچوون، ئەم بڕیار و راسپاردانەی خوارەوە دران:
1- نۆرینگەی تەندروستیی (شێخ كەمال) سزای پێبژاردن درا و داخرا، بەهۆی ئەوەی وەك پزیشك خۆی ناساندووە، سەرەڕای ئەوەش دەرمانی ماوەبەسەرچوو و نەگونجاوی هەبووە، هەروەها شوێنەكەشی گونجاو نییە.
2- دەرمانخانەی (حاجیاوا) سزای پێبژاردن درا و ئاگاداركرایەوە، بەهۆی دەرمانی بێ سەرچاوە و ماوەبەسەرچوو، هەروەها
نەگونجاویی شوێنەكەی لە رووی ساردی و گەرمییەوە.
3- تاقیگەی پزیشكیی (سەرهەد) دەستخۆشیی لێكرا.
4- هەریەك لە دەرمانخانەی (شیفا)، دەرمانخانەی (كارزان)، دەرمانخانەی (شاری نوا)، دەرمانخانەی (د. شاكار)، نۆرینگەی تەندروستیی (فەرهاد)، نۆرینگەی ددانی (سابیر محەمەد) ئاگاداركرانەوە.
