لێپرسراوی هێڵی گەرمی منداڵان لە سلێمانی رایدەگەیەنێت، هیچ منداڵێک ناتوانێت لە رێگای ئێمەوە سکاڵا لە دایک و باوکی بکات و داوا بکات لە دەستی خێزانەکەی رزگاری بێت.
هاوڕێ محەمەد لێپرسراوی هێڵی گەرمی منداڵان (116) لە سلێمانی بە تۆڕی میدیایی ئێستای راگەیاند، هێڵەکەمان لە ساڵی 2013 ەوە کاردەکات و لە رێگای چەندین توێژەر و کەسی پسپۆڕی راهێنراو بە چەندین شێواز خزمەت بە منداڵان و خێزانەکانیان دەکات.
ئاماژەی بەوەشکرد، دەمانەوێت بۆ هەموو خەڵک روونبێتەوە، کاری هێڵەکەی ئێمە ئەوە نییە وەک وڵاتانی ئەوروپا منداڵ پەیوەندی بکات و سکاڵا لە دایک و باوکی بکات و داوای رزگاربوونی بکات لە دەستی دایک و باوکی، چونکە نە یاساکانی ئێمە رێگابەوە دەدەن، نە لە کلتوری ئێمەدا گونجاوە.
ئاشکراشیکرد، لە ساڵانی رابردوودا لەلایەن رێکخراوەکان و لایەنە پەیوەنیدارەکان زۆر هاوکاری دەکراین، هەندێک کات کاتی کارکردنمان کردووە بە 24 کاتژمێری، بەڵام لە ئێستادا بەهۆی ئەوەی هیچ هاوکارییەک ناکرێین کارەکانمان لە بەیانیان تا نیوەڕۆیە.
