وەزیرى کارەبا رایدەگەیەنێت، پێشنیارى خۆیان بۆ نرخى کارەباى پرۆژەى رووناکى رەوانەى ئەنجومەنى وەزیران کردووە و دەشڵێت، ئەو نرخەى ئێستا دانراوە ئەوەندە زۆر نییە.
کەمال محەمەد، وەزیرى کارەباى سلێمانى لە لێدوانێکدا رایگەیاند، نرخى کارەبا رێکاریی یاسایى هەیە، ئەو نرخەى پێشتر کە لە 18 دینارەوە دەستپێدەکات تا 240 دینار بۆ هەر کیلۆوات کاتژمێرێک بەرکارە.
وتیشى، “بۆ نرخى کارەباى پرۆژەى رووناکى وەکو ئەنجومەنى وەزارەت پێشنیارى خۆمان بۆ ئەنجومەنى وەزیران ناردووە، دەبێت لە ئەنجومەنى وەزیران پەسەندبکرێت و بچێتە رۆژنامەى وەقایع و بڵاوبکرێتەوە و کارى پێبکرێت”.
نمونەى ئەوەشى هێنایەوە لە هەولێر 104 هەزار هاوبەش هەن، لەو ژمارەیە 65%یان مانگى سێ پارەى کارەبایان لە خوار 42 هەزار دینارەوە بووە.
وەزیرى کارەبا دووپاتیشیکردەوە، “واتە ئەو نرخانە مەعقولن، پێشتر دوو بڕە پارەیان دەدا و ئێستا یەک، بڕەکەشى بەپێى بەکارهێنانە، چەندێک بەکارهێنانیان زۆرتربێت، پارەى زۆرتریان بۆ دێتەوە”.
