بەڕێوەبەرایەتیی بەرگریی شارستانیی راپەڕین رایگەیاند، پاشنیوەڕۆی ئەمڕۆ لە مەیدانی سەرەوەی حاجیاوا ئاگرکەوتەوە.
لە راگەیەندراوێکی بەڕێوەبەرایەتیی بەرگریی شارستانیی راپەڕیندا هاتووە، ئەمڕۆ کاتژمێر 03:40ـی پاشنیوەڕۆ، تیمی بنکەی بەرگریی شارستانیی حاجیاوا ئاگادارکرایەوە کە دووبارە رووداوێکی ئاگرکەوتنەوە ھەیە لە مەیدانی سەرەوەی حاجیاوا.
دەشڵێت، دوای ئاگادارکردنەوە، تیمی بنکە گەیشتنە شوێنی رووداوەکە و توانییان لە ماوەیەکی کەمدا و پێش ئەوەی تەشەنەبکات بۆ ناو دوکانەکان، ئاگرەکە کۆنترۆڵبکەن .
بەرگریی شارستانیی راپەڕین دەڵێت، هۆکاری ئاگرکەوتنەوەکە نادیاربووە و بەهۆیەوە (دوو جێگا جل و بەرگی کۆنەی سەرمێز و نەمامگەیەکی بچووك) سووتاون، بەبێ ئەوەی زیانی گیانیی لێبکەوێتەوە.
