مەكتەبی سیاسی یەكێتیی نیشتمانیی كوردستان پەیامێكی پیرۆزبایی ئاڕاستەی رۆژنامەنووسانی كوردستان دەكات و رایدەگەیەنێت، “پشتیوانیی خۆمان بۆ رۆژنامەنووسانی وردبین و راستبێژ و پشتبەستوو بە سەرچاوەی هەواڵ دووپاتدەكەینەوە، بە جۆرێكی وەها كە لەسەرتاسەری كوردستاندا پانتایی ئازادییان بۆ فراوانتربكرێت”.
دەقی پەیامەكە…
لە یادی سەد و بیست و حەوت ساڵەی رۆژنامەگەری كوردیدا، گەرمترین پیرۆزبایی لە رۆژنامەنووسانی كورد و لە كایەی میدیایی كوردستان دەكەین كە توانیویانە لێبڕاوانە گەشە بەو بوارە بدەن.
ئەگەر چی كاروانی رۆژنامەگەریی كوردیی لە سایەی داگیركەراندا چەندین ساڵی سەختی لە هەرەشەی داخستن و راوەستان بینیوە، بەڵام لە پاش راپەڕینی ساڵی 1991وە دەتوانرێت بوترێت رۆژنامەگەریی كوردیی جۆرێك لە بەرفراوانبوونی ئازادییەكانی بەخۆوەبینی و خۆشبەختانە تائێستاش بەردەوامە.
یەكێتیی نیشتمانیی كوردستان هەر لەسەردەمی خەباتی شاخەوە گرنگییەكی بەرچاوی بە دابینكردنی ئازادی بۆ رۆژنامەگەریی و رووناكبیری داوە و دروشمی (نان و ئازادی)پڕاو پڕ جێبەجێكردووە، هەر بۆیە لە پاش راپەڕینەوە لەسەر هەمان دیدی سەرۆك مام جەلال، گشت هەوڵێكی خستووەتەگەڕ بۆ بەرفراوانكردنی ئازادییەكانی رۆژنامەگەری و یەكەمین رۆژنامە و دامەزراوی میدیایی ئەهلی و سەربەخۆ لە ناوچەكانی دەسەڵاتی یەكێتیدا دەرفەتیان بۆ رەخسا و لێرەوە كاروانی رۆژنامەگەری كوردیی بێوچان پێشدەكەوێت.
هەر لەم یادەدا جارێكی تر پشتیوانی خۆمان بۆ رۆژنامەنوسانی وردبین و راستبێژ و پشت بەستوو بە سەرچاوەی هەواڵ دووپاتدەكەینەوە، بە جۆرێكی وەها كە لە سەرتاسەری كوردستاندا پانتایی ئازادییان بۆ فراوانتربكرێت و كایەی ئازادی سیاسیی و رۆژنامەگەری بێ بەربەست و كەیسی نارەواو هەڵبەستراو هەرگیز تەنگ نەكرێتەوە.
میللەتەكەمان شایانی ئازادی زیاترە و ئازادی و دیموكراسیش پایەی سەرەكی شانازیمانە بە ئەزموونەكەمان لەسەرتاسەری جیهاندا.
جارێكی تر پیرۆزە
مەكتەبی سیاسیی
یەكێتیی نیشتمانیی كوردستان
