بەڕێوەبەرایەتیی گشتیی کاروباری مین/ هەولێر هۆشداری دەداتە ئەو (پەیج و ئەکاونت)ـانەی ڤیدیۆ و وێنەی سەرکێشیکردن بە مین بڵاودەکەنەوە.
لە ئاگادارییەکی بەڕێوەبەرایەتیی گشتیی کاروباری مین/ هەولێر کە وێنەیەکی دەست تۆڕی میدیایی ئێستا کەوتووە، هاتووە، “بەپێی بەدواداچوونەکانمان، لە ماوەی رابردوو کۆمەڵێک (پەیج وئەکاونتی) ناسراو و نەناسراو، گرتەی ڤیدیۆیی و وێنەی سەرکێشیکردن بە (مین و تەقەمەنی) و بەزاندنی سنووری کێڵگەکانی مین و تەقەمەنی کە ناوچەی قەدەغەکراوە، بڵاودەکەنەوە”.
دەشڵێت، ئەو لایەنانە بەجۆرێک وێنە و ڤیدیۆکان بڵاودەکەنەوە، کە مەترسیی مین لای هاوڵاتییان کەمدەکەنەوە و بووەتە هۆکاری روودانی کارەساتی مەرگباری گەورە و قوربانی لێکەوتووەتەوە.
بەڕێوەبەرایەتییەکە هۆشداریش دەداتە ئەو هەژمار و کەسانەی کە کاری هاوشێوە ئەنجامدەدەن و دەڵێت، “رێکاری یاساییان لە دژ دەگرینەبەر”.
