کەشناسیی عێراق رایگەیاند، “شەپۆلێکی خۆڵبارین ناوچەکانی وڵات دەگرێتەوە و پلەی گەرمی بەرزدەبێتەوە”.
دەستەی گشتیی کەشناسی و بومەلەرزەزانیی عێراق بڵاویکردەوە، “سبەینێ یەکشەممە، لە ناوچەکانی ناوەراست و باکوور ئاسمان نیمچەهەور دەبێت، لە ناوچەکانی باشوور کەمێک هەور دەبێت، پلەی گەرمی لە سەرجەم ناوچەکان بەرزدەبێتەوە”.
باس لەوەشدەکات، “رۆژی دووشەممە، ئاسمان نیمچەهەور دەبێت، ئەگەری نمەباران هەیە و لە ناوچەکانی ناوەراست و باکوور خێرایی با 10 بۆ 20 کیلۆمەتر لە کاتژمێرێکدا زیاددەکات، هەروەها تۆز و خۆڵیشی لەگەڵدا دەبێت کە سەرجەم ناوچەکان دەگرێتەوە”.
کەشناسیی عێراق دەڵێت، “رۆژانی سێشەممە و چوارشەممەی ئەم هەفتەیە بەهەمان شێوە خۆڵبارین بەردەوامدەبێت و پلەی گەرمی لە سەرتاسەری عێراق بەرزدەبێتەوە”.
