ئەندامێكی پەرلەمانی كوردستان رایدەگەیەنێت، یەكێتی ماوەی سێ مانگە لە گفتوگۆدایە و تائێستا بەهیچ شێوەیەك باسی ئیستیحقاق و پۆستی نەكردووە و ئەوەی گرنگە لای یەكێتی حكومەتێكی بەهێز و خزمەتكاری خەڵكە.
شیرین یونس، ئەندامی پەرلەمانی كوردستان لە فراكسیۆنی یەكێتیی نیشتمانیی كوردستان لە لێدوانێكدا بە تۆڕی میدیایی ئێستای راگەیاند، زۆرێك دوكانی سیاسی بەناوی ئۆپۆزسیۆنەوە خەریكی گەرمكردنی بازاڕی خۆیانن و داوا و ویستی خەڵك بەكاردەهێنن بۆ بەرژەوەندیی شەخسیی خۆیان.
وتیشی، “سوپاس بۆ خوای گەورە یەكێتیەكەمان بە عەقڵییەتێكی دووربین لە گفتوگۆدایە بۆ ئەوەی زەمانی ژیانی خەڵك لە كابینەی نوێ جێگیربكرێت و خەڵكی كوردستان و شاهێدن كە یەكێتی سێ مانگە لە گفتوگۆدایە و تائێستا بەهیچ شێوەیەك باسی ئیستیحقاق و پۆستی نەكردووە و ئەوەی گرنگە لای یەكێتی حكومەتێكی بەهێز و خزمەتكاری خەڵكە.
راشیگەیاند، بافڵ جەلال تاڵەبانی سەرۆكی یەكێتی دەستی ئاشتی بۆ هەموو لایەنێك درێژكردووە و لەسەر ئەو سیاسەتەش لەپێناو خەڵكی كوردستاندا بەردەوامدەبێت.
