نێچیرڤان بارزانی، سەرۆکی هەرێمی کوردستان لە نۆیەمین دیداری سلێمانیدا رایگەیاند، پێویستە پەرلەمانی کوردستان کارا بێت و ئەرکی سەرجەم لایەنەکانە بە زووترین کات، کابینەی نوێی حکومەتی هەرێم پێکبهێنن، بەجۆرێک کە رەنگدانەوەی داواکاریی و خواستی هاولاتییان بێت.
وتیشی، “شاری سلێمانی هەمیشە قەڵایەکی بەرزی نیشتمانپەروەری بووە و مینبەرێکی گرنگ بووە بۆ گۆرینەوەی بیروبۆچوون و گفتووگۆ و لەبارەی پرسە ئەرێنی و گرنگەکانەوە”.
ئاماژەی بەوەشدا، کورد و گەلی کوردستان هەمیشە ئاشتیخوازن و بە هەموو ئومێدەوە بەرەورووی ئاشتی دەچن، هەرێمی کوردستانیش سەلماندوویەتی کە بەردەوام دەتوانێت رۆلێكی ئەرینی لە ئاسایش و ئارامیدا بگێڕێت، چونکە بڕوای تەواومان بە یەکتر تەواوکردن لەگەڵ وڵاتانی ناوچەکەدا هەیە.
ئەوەشی خستەڕوو، گەشەکردنی کوردستان پەیوەستە بە سەقامگیری عێراق و پێشکەوتنی کوردستان کاریگەری لەسەر عێراق هەیە، هەربۆیە گرنگە، هەموومان لەم ناوچەیەدا بە گیانی یەکتر قبوڵکردن دەستی دۆستایەتی بخەینە دەستی یەکتر و ئاشتی بەدیبهێنین، تا ئەم ناوچەیە ببێتە ناوچەیەکی گرنگی جیهانی.
