قوباد تاڵەبانی، جێگری سەرۆك وەزیران پێشوازیكرد لە ڤیكتۆریا تایلۆر، جێگری یاریدەدەری وەزیری دەرەوەی ئەمریكا و لە كۆبوونەوەی نێوانیاندا چەند پرسێكی جێی بایەخی هەردوولا تاوتوێكران.
لە تەوەرێكی كۆبوونەوەكەدا كە رۆژی سێشەممە بەڕێوەچوو، لەبارەی دۆخی سوریا و پڕۆسەی ئاشتی لە توركیا و دوایین گۆڕانكارییەكانی ناوچەكە ئاڵوگۆڕی بیروڕاكرا.
دۆخی سیاسیی ناوخۆی هەرێمی كوردستان و پرسی پێكهێنانی حكومەتی نوێی هەرێم تەوەرێكی دیكەی كۆبوونەوەكە بوو، لەمبارەیەوە جێگری سەرۆك وەزیران بە ئاماژەدان بە دوایین كۆبوونەوەی نێوان پارتی و یەكێتی روونیكردەوە گفتوگۆكان بەباشی بەڕێوەدەچن و هەموو هەوڵەكان بۆ ئەوەیە بە زووترین كات رێككەوتن بكرێت لەسەر پێكهێنانی حكومەتێكی بەهێز و كارا و یەكگرتوو.
لە بەشێكی دیكەی كۆبوونەوەكەدا باس لە پەیوەندییەكانی نێوان هەرێمی كوردستان و ئەمریكا كرا، لەم چوارچێوەیەدا قوباد تاڵەبانی رایگەیاند هەرێمی كوردستان دەرفەتی زۆر گەورە هەیە بۆ كۆمپانیاكان و وەبەرهێنەرانی ئەمریكی و حكومەتی هەرێم خوازیارە كۆمپانیا و وەبەرهێنەرانی ئەمریكا بەشدارییەكی گەورەتریان هەبێت لە پڕۆسەی گەشەپێدانی هەرێمدا و بۆ ئەمەش ئامادەیە هەموو جۆرە هاوكاری و كارئاسانییەكیان پێشكەشبكات.
