بەهۆی تەقینەوەی مین لە چیای قەلەرەش لە سنووری سیدەکان گەنجێک گیانیلەدەستدا.
بەڕێوەبەرایەتیی بەرگریی شارستانیی سۆران بڵاویکردەوە، بەیانی ئەمڕۆ لە چیای قەلەرەش لە سنووری سیدەکان مین تەقیوەتەوە و قوربانی لێکەوتووەتەوە.
بەپێی زانیارییەکان، لە رووداوی تەقینەوەکەدا گەنجێک بە ناوی محەمەد هەینی گیانیلەدەستداوە و کەسێکی دیکەش برینداربووە.
ئەو دوو گەنجە بەمەبەستی کۆکردنەوەی گیا بەهارییەکان روویان لە سنوورەکە کردووە.
لە سەرەتای ئەمساڵەوە تا ئێستا ئەمە چوارەمین رووداوی تەقینەوەی مینە لە سنوورەکە روویدابێت کە بەهۆیانەوە، سێ کەس گیانیان لەدەستداوە و دووانی دیکەش برینداربوون.
