قوباد تاڵەبانی، لە پەیامێكدا بە بۆنەی كۆمەڵكوژیی كوردانی فەیلی، جەختی لەسەر پێگەی كوردانی فەیلی كردەوە وەك یەكێك لە رەسەنترین پێكهاتەكانی كوردستان و عێراق.
لە پەیامەكەی قوباد تاڵەبانی، جێگری سەرۆكی حكومەتی هەرێم دا هاتووە، “كوردە فەیلییەكان هاوشێوەی كوردانی ئێزدیی لەگەڵ ئەوەی لە رەسەنترین پێكهاتەكانی كوردستان و عێراقن، بەڵام لە 100 ساڵی رابردوودا لە ستەملێكراوترین پێكهاتەكانیش بوون”.
جێگری سەرۆكی حكومەتی هەرێم دەشڵێت، ” كوردانی فەیلی هەم بەهۆی جیاوازیی ئاینیی و هەم بەهۆی كوردبوونیانەوە بەردەوام چەوسێنراونەتەوە و وەك بێگانە سەیركراون”.
لە درێژەی پەیامەكەیدا قوباد تاڵەبانی نووسیوویەتی “گەلی كورد نەك هەر كۆمەڵكوژكردن و وڵاتبەدەركردنی كوردانی فەیلی لەسەر دەستی رژێمی لەناوچووی بەعس لەبیرناكات، بەڵكو لە ساڵڕۆژی ئەو تاوانە مەزنە دەكاتە هەوێنی پتەوكردنی هاوچارەنووسی و یەكێتیی زیاتری نێوان پێكهاتە جیاوازەكانی گەلی كوردستان”.
لە كۆتایی پەیامەكەیدا هاتووە، وەبیر نوێنەرانی كورد لە بەغداد دەخەینەوە كە هەموو هەوڵی خۆیان بخەنەگەڕ بۆ قەرەبووكردنەوە و گەڕاندنەوەی مافە زەوتكراوەكانی كوردانی فەیلی”.
