شارەزایەکی بواری کەشناسی رایدەگەیەنێت، شەپۆلێکی بەھێزی باران، ھەورەبروسکە بەڕێوەیە و هەفتەی داهاتووش، تەرزە دەبارێت.
ئاراس جەبار، شارەزای بواری کەشناسی بڵاویکردەوە، سبەی چوارشەممە، لە کاتەکانی نیوەڕۆوە ھەورەبروسکە و تاوەباران لە ناوچەکانمان دەستپێدەکاتەوە، بەتایبەت لەسەر ناوچە شاخاوییەکانی پارێزگای دھۆک و ھەولێر و ئیدارەی سۆران چالاکتر دەبێت، ھەندێک کاتیش بارانی بەخوڕ دەبارێت و پاشان بە کاریگەریی لاواز، درێژدەبێتەوە بۆ سەر ناوچەکانی پارێزگای سلێمانی و ھەڵەبجە و ئیدارەی راپەرین بەشێوەی نمەباران و لە ھەندێک شوێنیش تاوەبارانی مامناوەند دەبارێت و ئێوارە کۆتایی پێدێت.
دەشڵێت، پلەی گەرمی بەجێگیری دەمێنێتەوە، تەنیا لە ناوچە شاخاوییەکان بەراورد بە ئەمڕۆ، 2 تا 3 پلە نزمدەبێتەوە، بای باشوری رۆژھەڵات کاتەکانی نێوان نیوەڕۆی سبەی بۆ ئێوارە چالاک دەبێت بەخێرایی 15 تا سەرووی 40 کیلۆمەتر لە کاتژمێرێکدا و ئەگەری بەرزبوونەوەی تۆز و خۆڵ دەبێت .
ئاماژەی بەوەشکرد، رۆژانی پێنجشەممە و ھەینی، کەش سەقامگیر دەبێت و لە بەرەبەیانی رۆژی شەممەوە 5/4/2025، ناوچەکانی پارێزگای سلێمانی و ھەڵەبجە و ئیدارەی راپەرین و گەرمیان دەکەونە بەر کاریگەریی تەوژمە ھەوایەکی تەڕ و شێدار، کە لە دەریای سور و کەنداوی عەرەبییەوە درێژدەبێتەوە و پێشبینیدەکرێت، بە درێژایی کاتەکانی رۆژی شەممە تا بەرەبەیانی رۆژی یەکشەممە 6/4/2025، ھەورە بروسکەی بەھێز، تەرزە و لێزمەباران لەو ناوچانەدا چالاک ببێت، لەگەڵ ئەگەری بەرزبوونەوەی ئاستی ئاو و دروستبوونی لافاویش لە ھەندێک کات و شوێندا، ناوچەکانی دیکەی ھەرێمی کوردستانیش بە رێژەیەکی لاوازتر دەگرێتەوە.
