ئەندامێكی سەركردایەتیی یەكێتی رایگەیاند، نابێت یەكێتی و پارتی پۆست بەسەر یەكتردا بسەپێنن و دەشڵێت، “لە چوار سەرۆكایەتییەكەی هەرێم، دوو پۆستمان دەوێت”.
رێباز بیركۆتی، ئەندامی سەركردایەتی یەكێتی نشتمانیی كوردستان لە میانەی چاوپێكەوتنێكدا رایگەیاند، دەبێت هەر چوار سەرۆكایەتییەكەی هەرێم دەسڵاتیان هەبێت بەبێ جیاوازی و سەرۆكی پەرلەمانیش خاوەنی دەسەڵاتی رەها بێت.
وتیشی، “دەبێت قوتی خەڵكی و باری دارایی و سەروەریی یاسا گرنگی خۆی هەیە و دەبێت هەرێمی كوردستان دەستووری هەبێت و ناشكرێت وەزیران ئەم حكومەتە بێدەسەڵات بكرێن”.
ئەوەشیخستەڕوو، ناكۆكییەكانی نێوان یەكێتی و پارتی كەمبوونەتەوە و بیروبێچوونەكان كۆبوونەوەتەوە و تێڕوانین و تێبینییەكانی هەردوولا بەرەو پێشبراون و سەرۆكی پەرلەمانیش كە پێشتر لەلای ئێمە بووە، دەبێت سەرۆك، سەرۆك بێت و وەزیریش وەزیر بێت؛ دەبێت خاوەن بڕیار بن”.
روونیشیكردەوە، دەبێت بودجەیەكی هاوبەش و دیار بوونی هەبێت و چیتر نابێت یەكێتی و پارتی ببنە هۆكارێك بۆ ئەوەی ئەم سنوور و ئەو سنوور بمێنێت و چیدیكە و دوای 34 ساڵ خەڵكی رێگا نادەن بە حكومەتی پینە و پەڕۆ ببەین بەرەو پێ.
سەبارەت بە پێكهێنانی حكومەتیشەوە ناوبراو ئەوەیخستەڕوو، ئەگەر بێت و یەكێتی و پارتی پێداگری لەسەر پۆست بكەن ئەوا جارێكی دیكە پێكهێنانی حكومەت دوا دەكوێت و دابەشكردنی پۆستەكانیش پێویستی بە كاتی زۆر نابێت و دەكرێت زوو حكومەتی هەرێم پێكبهێندرێت.
