کەشناسیی هەرێم بڵاویکردەوە، لە رۆژانی جەژنی رەمەزاندا شەپۆلێکی بارانبارین هەرێمی کوردستان دەگرێتەوە.
لە راگەیەندراوێکی بەڕێوەبەرایەتیی کەشناسی و بومەلەرزەزانیی هەرێمدا هاتووە، “پێشبینیدەکرێت رۆژى یەکشەممە ئاسمانى هەرێم نیمچە هەور بۆ هەوری تەواو بگۆڕێت، لەگەڵ هاتنى شەپۆلێکى نمە باران و هەورە تریشقەى پچڕ پچڕ لە کاتەکانى دوای نیوەڕۆدا بۆ سەر زۆربەى ناوچەکانى هەرێم هاوکات خێرایی با چالاک دەبێت.
ئاماژەی بەوەشکرد، رۆژی دووشەممە نمە بارانى پچڕپچڕ و هەورە بروسکە بەردەوام دەبێت بەتایبەت لە ناوچە شاخاوییەکان و ناوچەکانى گەرمیان و رۆژهەڵاتى هەرێم، لە دواینیوەڕۆوە شەپۆلەکە کۆتایی دێت و پلەکانى گەرما (3-5) پلەى سیلیزى نزم دەبێتەوە.
ئاشکراشیکرد، پێشبینیدەکرێت لە ناوچە شاخاوییەکانى دهۆک و هەولێر و بەشێک لە ناوچەکانى گەرمیان رێژەیەکى زیاتر بارانى لێببارێت.
