وەزارەتی کارەبای هەرێم بڵاویکردەوە، تا ئێستا لەسەرانسەری هەرێمی کوردستان 415 هەزار هاوڵاتی کارەبای 24 کاتژمێرییان بۆ دابینکراوە و نزیکەی 600 مۆلیدەی تایبەت لە کارکردن وەستێنراون لە 35 گەڕەکی جیاواز.
لە راگەیەندراوێکی وەزارەتی کارەبای هەرێمدا هاتووە، لە رێگای پڕۆژەی رووناکی، وەزارەتی کارەبا هەڵدەستێت بە دابینکردنی کارەبای نیشتیمانیی 24 کاتژمێری بۆ شەش گەڕەکی دیکەی شاری هەولێر کە بریتین لە گەڕەکەکانی (تەیراوە، مستەوفی، کورانی عەنکاوە، عەنکاوە، سەڵاحەددین و منارە).
ئاماژەی بەوەشکرد، پڕۆژەی رووناکی بەردەوامە لە فراوانبوون و تا ئێستا لە سەرانسەری هەرێمی کوردستان 415 هەزار هاوڵاتی کارەبای 24 کاتژمێرییان بۆ دابینکراوە و نزیکەی 600 مۆلیدەی تایبەت وەستێنراون لە 35 گەڕەکی جیاواز.
هەر لە راگەیەندراوەکەی وەزارەتی کارەبادا هاتووە، لەسەر ئاستی هەولێر، تا ئێستا 26 گەڕەک و 346 هەزار هاوڵاتی لە خزمەتگوزاریی کارەبای 24 کاتژمێری سوودمەندبوون.
