لە ئەمڕۆوە پەرستارانی عێراق بایکۆتی دەوام دەکەن.
فیراس موسەوی، نەقیبی سەندیکای پەرستارانی عێراق راگەیاند، ” لە ئەمڕۆوە کارکردن لە سەرجەم دامەزراوە تەندروستییەکان، نەخۆشخانە و کەرتەکان جگە لە شوێنە هەستیارەکان رادەگرین و بایکۆتی دەوام دەکەین”.
وتیشی، “لەبەر پێویستیی هاوڵاتییان 50%ی پەرستاران لە دەوامی خۆیان بەردەوامدەبن و شێوازی مانگرتنەکە نیو بە نیو دەبێت”.
باسی لەوەشکرد، “بەهۆی جێبەجێ نەکردنی داواکارییەکانمان لەلایەن حکومەتەوە، ئەو بڕیارەمان داوە و بۆ لقەکانمان لە سەرجەم پارێزگاکان ناردووە و هەموو ئەو پەرستارانەی سەر بە سەندیکاکەمانن پابەندی بڕیارەکە دەبن”.
پەرستاران نزیکەی 30 داواکارییان هەیە، دیارترینیان بریتیین لە، “زیادکردنی دەرماڵەی مەترسی بە رێژەی 20% بۆ ئەوەی ببیت بە 100%، پێدانی پۆستی باڵا لە دامەزراوە تەندروستی و کارگێڕییەکان بۆ پەرستارانی هەڵگرانی بڕوانامەی باڵا، دابەشکردنی زەوی بەسەر سەرجەم پەرستاراندا، کردنەوەی بۆردی عێراقی و عەرەبی بۆ پەرستاران و دامەزراندنی دەرچووانی 2024، تەرخانکردنی کۆمەڵگەی نیشتەجێبوون بۆ پەرستاران لە سەرجەم پارێزگاکانی عێراق، بە هەڵگرتنی ناوی ئەوان، وەک پێزانین بۆ هەوڵ و قوربانیدانەکانیان”.
