لە یەکەم پەیوەندیی تەلەفۆنیدا دوای ئەوەی بەشێوەیەکی فەرمیی وەک وەزیری بەرگریی ئەمریکا دیاریکرا، لوید ئۆستن لەگەڵ ئەمینداری گشتیی ناتۆدا پەیوەندییەکی تەلەفۆنیی سەبارەت بە پرسەکانی پەیوەست بە عێراق و ئەفغانستان ئەنجامدا.
لە ڕاگەیەنراوێکدا وەزارەتی بەرگریی ئەمریکا ئەمڕۆ شەممە 23ی کانونی دووەم ڕایگەیاند، هەردوولا گفتوگۆیان سەبارەت بە بارودۆخی ئێستای جیهان و گرنگیی پاراستنی هێز و پێگەی ناتۆ و بەردەوامی ئەرک و ئامانجەکان لە عێراق و ئەفغانستان گفتوگۆیان کرد.
ئیدارەکەی جۆ بایدن دوێنێ هەینی، ڕایگەیاند کە پێداچوونەوە بە رێککەوتنی ئاشتیی نێوان ئەمریکا و تالیبان دەکات.
بەپێی ڕێککەوتنی نێوان ئەمریکا و تالیبان، ئەمریکا لە مانگی ئایاری 2021دا سەرجەم هێزەکانی لە ئەفغانستان دەکشێنێتەوە لەبەرامبەردا تالیبان ڕێگە بە هیچ گێرەشێوێنیەک نادات لەو وڵاتە و چالاکییە چەکدارییەکانی کۆتاییپێدێنێت لە ئەفغانستان و بەڵێنی پاراستنی ئاسایشی وڵاتەکەیاندا.
