د. هەڤاڵ ئەبوبەكر پارێزگاری سلێمانی پەیامێكی بڵاوكردووەتەوە و دەڵێت، “بۆ كوردان نەتەوە ڕەسەن و دێرین و جوامێرو فیداكارەكە لە هەر شوێنێكی ئەم جیهانەدابن نەورۆز و ساڵی نوێی كوردیتان پیرۆزبێت”.
دەشڵێت، “نەورۆزی ئەمساڵ نەورۆزی ئازادیی و ژیانەوە و بەهار و بەهات و ئاشتیی و تەبایی و گەشانەوەی گشتییە، كورد هەمیشە پشتیوانی دیالۆگ و لێبوردەیی و قبووڵكردنی یەكتر و پێكەوەژیان بووە، وا بە تێكۆشان و هەوڵی هەمووان بەرەو رۆشنایی ئومێدی سەركەوتن دەڕۆین و بەیەكەوەبوون و هاوخەباتیمان خێراتر و بەهێزتر و بەرهەمدارتر دەمانگەیەنێتە ئامانجەكانمان”.
پارێزگاری سلێمانی وتیشی، “كورد لە هەر پنتێكی ئەم جیهانەدا بێت ئەو شوێنەش كوردستانە، سەرتان داگیرسێنن، تا نەورۆز لە هەموو شوێنێكی جیهاندا دۆستانە، مرۆڤانە و جوامێرانە دەكەنەوە و هەموو زەوی دەكەنە خۆرێكی داگیرساو، دەیكەنە پەیام و پەیك و هێمای نیشتمانی گەردوونگەرای كوردستان”.
