بەڕێوەبەرایەتیی پۆلیسی ئاکرێ رایگەیاند، سەرلەبەیانیی ئەمڕۆ ئاگادارکرانەوە کە ژنێک لە کەمپی ماملیان لەلایەن هاوسەرەکەیەوە خنکێندرا.
بەڕێوەبەرایەتییەکە لە راگەیەندراوێکدا دەڵێت، پاش ئاگادارکردنەوەیان، دەستبەجێ فەوجی پۆلیسی کەمپی ماملیان گەیشتنە شوێنی تاوانەکە و لەگەڵ تیمی بەشی لێکۆڵینەوەی تاوان، فەرمانگەی نەهێشتنی تاوانی سیپا، بنکەی پۆلیسی گەردەسین و بەڕێوەبەرایەتیی پۆلیسی ئاکرێ لێکۆڵینەوەیان دەستپێکرد.
ئاماژە بەوەشکراوە، بەپێی لێکۆڵینەوە سەرەتاییەکان، ژنەکە تەمەنی 29 ساڵە و لەلایەن هاوسەرەکەیەوە خنکێندراوە، لەئێستادا تەرمەکەی گواستراوەتەوە بۆ بەشی پزیشکی دادوەری لە پارێزگای دهۆک بۆ لێکۆڵینەوەی زیاتر.
دەشڵێت، پۆلیسی کەمپی ماملیان تۆمەتبارەکەیان دەستگیرکردووە و بەپێی ماددەی 406 لە یاسای سزادانی عێراقی راگیراوە و لێکۆڵینەوە بەردەوامە.
