قوباد تاڵەبانی، لێپرسراوی سكرتارییەتی سەرۆك مام جەلال رایگەیاند، دەبێت یانەی وەرزشیی سلێمانی بۆ پێگە شیاوەكەی بگیەڕێننەوە و دەشڵێت، ” مێژووی وەرزش لە سلێمانی بە یانەی وەرزشیی سلێمانی-یەوە گرێدراوە”.
قوباد تاڵەبانی لە راگەیەندراوێكدا بڵاویكردەوە، مێژووی وەرزش لە سلێمانی بە یانەی وەرزشیی سلێمانییەوە گرێدراوە و چەندین نەوەی خەڵكی سلێمانی بیرەوەرییان لەگەڵ ئەم یانەیەدا هەیە”.
ئاماژەی بەوەشكرد، “یانەی وەرزشیی سلێمانی یانەی دایكە و دەبێت لەم قۆناغەدا شوێن و پێگەی شیاوی خۆی بۆ بگەڕێتەوە و لەگەڵ سەرۆك و ئەندامانی دەستەی كارگێڕی یانەكە كۆبوومەوە، گفتوگۆی تێروتەسەلمانكرد لەبارەی چۆنییەتی بووژانەوە و گەشەپێدانی یانەكە كە لە ئێستادا خاوەنی چەندین تیپە لە بوارە جیاوازە وەرزشییەكاندا”.
ئەوەشیخستەڕوو، “بە شانازییەوە بەندەیان وەك سەرۆكی فەخریی یانەكە دەستنیشان كرد و بڕیارماندا لە ماوەیەكی كورتدا پلانێكی تۆكمە بۆ پێنج ساڵی داهاتووی یانەكە ئامادەبكرێت تا بە هەوڵ و هیمەتی هەموو لایەكمانەوە یانەی سلێمانی بگەیەنینەوە ئەو ئاستەی كە شایستەی ناوبانگ و مێژووە پڕشنگدارەكەیەتی”.
