کوەیت یاسای باری کەسێتی وڵاتەکەی هەموارکردەوە کە تێیدا تەمەنی هاوسەرگیری بۆ 18 ساڵ بەرزکردەوە.
بەپێی مەرسومێک کە لە رۆژنامەی رەسمی کوەیت بڵاوکراوەتەوە، هەمواری ماددەی 26 ی یاسای باری کەسێتی کراوە و لە رۆژی بڵاوکردنەوەی دەکەوێتە بواری جێبەجێکردنەوە.
بەپێی هەموارەکە، رێگا بە واژووکردنی هیچ گرێبەستێکی هاوسەرگیریی نادرێت کە تەمەنی هاوسەرەکان لە 18 ساڵان کەمتربێت.
هەمواری یاسای باری کەسێتی لە کوەیت بە مەبەستی کەمکردنەوەی حاڵەتەکانی جیابوونەوە و توندوتیژییە دژی ژنانی وڵاتەکە.
ناسر سمیت وەزیری دادی کوەیت پێشتر رایگەیاندبوو، 30% ی هاوسەرگیری پێشوەختە لە وڵاتەکە، هاوڵاتییانی بیانین، کە زۆرینەیان سعودی و سوری و ئێرانی و ئەفغانین.
