کەشناسیی عێراق رایگەیاند، دوای کەمبوونەوەی شەپۆلی بارانبارین، لە چەند رۆژی داهاتوودا، پلەکانی گەرما لە تەواوی عێراق روو لە بەرزبوونەوە دەکەن.
دەستەی گشتیی کەشناسی و بومەلەرزەزانیی عێراق بڵاویکردەوە، بەیانیی سبەی چوارشەممە، لە بەشێک لە ناوچەکانی عێراق و باشووری هەرێمی کوردستان تەم دروستدەبێت و دواتر دەبێتە پەڵەهەور، هەروەها پلەکانی گەرما لە تەواوی ناوچەکان بەرزدەبنەوە.
دەشڵێت، کەشوهەوای رۆژی پێنجشەممەش بە هەمان شێوەی رۆژی چوارشەممە دەبێت، بەڵام پلەکانی گەرما لە هەرێمی کوردستان و بەتایبەتیش لە خوارووی عێراق، بەرزتردەبنەوە.
ئاماژەی بەوەشکرد، “رۆژی هەینی بەگشتی ئاسمان ساماڵ بۆ نیمچەهەور دەبێت و پلەکانی گەرما بەگشتی هاوشێوەی رۆژی پێنجشەممە دەبن”.
