سەرۆکی ئەرجەنتین رایدەگەیەنێت، لە رۆژی هەینییەوە لە شاری باهیا بلانکا-ی ئەو وڵاتە، لافاو دروستبووە و بەهۆیەوە تائێستا 16 کەس گیانیانلەدەستداوە و دەیان کەسی دیکەش بێسەروشوێنن.
خاڤیێر میلی، سەرۆکی ئەرجەنتین لە کۆنفرانسێکی رۆژنامەوانیدا سێ رۆژ ماتەمینیی گشتیی راگەیاند و پاش کۆنفرانسەکەش، سەرۆکایەتیی ئەو وڵاتە لە بەیاننامەیەکدا رایگەیاندووە، “هەموو سێکتەرەکانی حکومەت بەردەوامدەبن لە تەرخانکردنی هێزەکانیان بۆ یارمەتیدانی قوربانییەکان”.
فێدریکۆ سۆسپلیس، سەرۆکی شارەوانیی باهیا بلانکا دەڵێت، زیانەکانی لافاوەکە بە 370 ملیۆن یۆرۆ مەزەندەدەکرێت.
شاری باهیا بلانکا 600 کیلۆمەتر لە باشووری بۆینس ئایرێس-ی پایتەختی ئەرجەنتینە و پێشتر چەندین رووداوی سەختی هاوشێوەی بەخۆیەوە بینیوە.
لە کۆتایی ساڵی 2023ـدا، زریانێکی بەهێز رووی لەو شارە کرد، بەجۆرێک، خێرایی با گەیشتە 150 کیلۆمەتر لە کاتژمێرێکدا؛ لە ئەنجامدا سەقفی یانەیەکی وەرزشی داڕووخا و بەهۆیەوە 13 کەس گیانیانلەدەستدا.
