ئەو وادەیەی واشنتن بۆ بەغدادی دانابوو لە پێناو هاوردەكردنی سەرچاوەی وزە لە تارانەوە كۆتایی هات و ئەندامێكی ئەنجومەنی نوێنەرانیش دەڵێت، “بارودۆخێكی سەخت چاوەڕوانمان دەكات”.
8ی مارسی 2025، كۆتا وادەی لێخۆشبوونەكەی ئەمریكا بوو بۆ عێراق كە رێگای بە بەغداد دەدا لە ئێرانەوە سەرچاوەكانی وزەیە بەتایبەت غاز و كارەبا دابینباكات.
لەمبارەیەشەوە ئەمرسەعدون لامی، ئەندامی لیژنەی نەوت و غاز لە ئەنجومەنی نوێنەرانی عێراق لە راگەیەندراوێكدا بڵاویكردەوە، عێراق لە ئێستادا جێگرەوەی نییە بۆ كارپێكردنی وێستگەكانی كارەبا و پچڕانی غازی ئێران دەبێتە هۆی كەمبوونەوەی سەعاتەكانی پێدانی كارەبا.
روونیشیكردەوە، هاوینێكی سەخت رووبەڕووی بەغداد و پارێزگاكانی دیكە دەبێتەوە و پێشبینیش دەكەین واشنتن دەستوپەنجە بۆ پرسی غاز نەرم بكات، ئەویش لەبەرانبەر جددی بوونی عێراق بەرانبەر داواكارییەكانی ئەمریكا.
