قەبارەی ئاڵوگۆڕی بازرگانی نێوان عێراق و سعودییە گەیشتە یەک ملیار و 300 ملیۆن دۆلار و باڵیۆزی عێراقیش دەڵێت، “گەشتەکانی نێوانیان زیاد دەکرێت”.
سەفیا سوهەیل، باڵیۆزی عێراق لە سعودییە رایگەیاند، لە ساڵی رابردوودا قەبارەی ئاڵوگۆری بازرگانی نێوان هەردوو وڵاتی عێراق و سعودییە گەیشتووەتە یەک ملیار و 300 ملیۆن دۆلاری ئەمریکی.
دەشڵێت، “هۆکاری ئەو قەبارە بازرگانییە فراوانە دەگەرێتەوە بۆ ئەوەی کە هەردوو وڵات خاوەنی پەیوەندییەکی مێژوویی هاوبەشن و چەندین رێکەوتنی ئابوری و ئاڵوگۆڕی بازرگانییان پێکەوە هەیە و بەجۆرێک کە 34 کۆمپانیای سعودیی لە عێراق و 46 کۆمپانیای عێراقیش لە سعودییە مۆڵەتییان هەیە و کاردەکەن”.
ئەوەشی خستەڕوو، کە بەئامانجی زیاتر بەهێزکردنی پەیوەندییەکانی هەردوو وڵات، لەمانگی داهاتووەوە، لە فڕۆکەخانەی بەغداد ژمارەی گەشتە ئاسمانییەکان بۆ سعودییە بە گشتیی و بۆ ریازی پایتەختی ولاتەکە بەتایبەتی زیاد دەکرێت.
