سەرۆكایەتیی شارەوانیی سلێمانی روونكردنەوەیەكی چەند خاڵی لەبارەی چەند پرسێكی گرنگ بڵاودەكاتەوە و هاوكات هاوڵاتییان ئاگاداردەكاتەوە.
بەپێی روونكردنەوەیەكی سەرۆكایەتیی شارەوانیی كە وێنەیەكی دەست تۆڕی میدیایی ئێستا كەوتووە و تێیدا هاتووە:
یەكەم: دوای دەركردنی یاسای قەدەغەكردنی زیادەڕۆیی ژمارە 3ی ساڵی 2018 كاری رێگریكردن و لابردنی زیادەڕۆیی لەسەر موڵكی دەوڵەت بە تەنها ئەركی شارەوانیمان نەماوە، بەڵكو ئەركی لیژنەی لابردنی زیادەڕۆییە و تەنها لەسەر فەرمانی سەرۆكی یەكەی كارگێڕی زیادەڕۆییەكە لادەبرێت.
خاڵی دووەم: چۆنییەتی بەكارهێنانی شۆستە و شەقامەكان و پاراستنی سیمای شار بەپێی ماددەی 28 بڕگەی 3 لە یاسای بەڕێوەبردنی شارەوانییەكان ژمارە 6 ساڵی 1993هەمواركراو لە دەسەڵاتی ئەنجومەنی شارەوانیدایە و پێشتر ئەنجومەن بڕیاری لەم بابەتەدا داوە و لایەنە پەیوەندارەكان لەسەر بڕیاری ئەنجومەن كاری لەسەر دەكەن و هەر بەكارهێنانێكی شۆستە و شەقامەكان رەزامەندیی یاسایی نەبێت ئەوا بە زیادەڕۆیی دادەنرێت و هەروەك خاڵی یەكەم مامەڵەی لەگەڵدا دەكرێت.
سێیەم: سەرۆكی شارەوانیمان هەموو رۆژێكی یەكشەممان و سێشەممان راستەوخۆ هاوڵاتییان دەبینێت بۆیە هەر هاوڵاتییەك داواكارییەكی هەیە كە پێویستی بە واژۆو لە دەسەڵاتی ئەودابێت دەتوانێت لەو رۆژانەدا سەردانی بەڕێزیان بكات و ئەوسا ئەگەر داواكارییەكە لەگەڵ یاسا و رێنماییەكاندا ناكۆك نەبێت ئەوا بۆتان جێبەجێدەكرێت و ئەگەریش ناكۆك بێت ئەوا بە روونكردنەوەی رەسمی وەڵامتان دەدرێتەوە.
چوارەم: ئەگەر هەر فەرمانبەرێكی شارەوانی لە هەر پلەیەكدا بێت داوای پارەی لێكردن ئەوا دەستبەجێ سەرۆكی شارەوانی یان بەشی كاروباری یاسایی شارەوانیمانی لێئاگاداربكەنەوە یاخود لە نزیكترین بنكەی پۆلیس سكالای لەسەر تۆماربكەن و دڵنیابن لەوەی دەست لە هیچ كەسێك ناپارێزرێت و هەر كەسێك بێت بە سزای خۆی دەگات.
