وەزارەتی ئاوادانکردنەوە و نیشتەجێکردنی عێراق رایگەیاند، 16 پڕۆژەی نیشتەجێبوون بۆ چارەسەرکردنی چڕی دانیشتوان جێبەجێدەکرێت، لەو ژمارەیەش پێنجیان دەستی بەکارکردن کردووە.
ئەمڕۆ شەممە، ئیستەبرق سەباح، وتەبێژی وەزارەتی ئاوەدانکردنەوە و نیشتەجێکردنی عێراق رایگەیاند، لە چوارچێوەی هەوڵەکانی حکومەتی عێراق بۆ چارەسەرکردنی کێشەی قەرەباڵغی و چڕی دانیشتوان، 16 پڕۆژەی نیشتەجێبوون دروستدەکرێت.
ئاماژەی بەوەشدا، لەو 16 پڕۆژەیە، پێنج پڕۆژەیان کارکردن تیایاندا دەستیپێکردووە و دوای تەواوبوونیان، سەرجەمییان بە نرخی گونجاو پێشکەشی هاوڵاتییان دەکرێت، پێشبینیش دەکەن سەرجەمی یەکەکان کە لەماوەی داهاتوودا تەواودەکرێن، نزیکەی سێ ملیۆن یەکەی نیشتەجێبوون پێکبهێنێت.
ئەوەشی خستووەتەڕوو، دروستکردنی پڕۆژەکان لە چوارچێوەی پلانی محەمەد شیاع سودانی، سەرۆکوەزیرانی عێراقدایە، تایبەت بە چارەسەرکردنی قەرەباڵغی دانیشتوان و چارەسەرکردنی دۆخەکە.
