وەزارەتى کارەبا پرۆژەى دابینکردنى کارەباى 24 کاتژمێرى بە سەرکەوتوو ناودەبات و هەڕەشە لەبارەى بڵاوکردنەوەى زانیاریى هەڵە دەکات.
وەزارەتى کارەباى هەرێم لە روونکردنەوەیەکدا رایگەیاند، لە هەندێ پەیج و ئەکاونتی پلاتفۆرمەکانی سۆشیاڵ میدیا، هەواڵی ناڕاست و چەواشەکارانە بە ناوی وەزارەتی کارەبا و فەرمانگەکانییەوە لەبارەی دۆخی کارەبا بڵاودەکرێنەوە.
دەشڵێت، لە ماوەکانی رابردوو دەستی بە پرۆژەی دابینکردنی کارەبای 24 کاتژمێری کردووە و لەو شوێنانەی لە پلانەکەیدایە، سەرکەوتوو بووە.
وەزارەتى کارەبا دووپاتیشیدەکاتەوە، تەنها لە رێگەی وتەبێژ و پەیجە فەرمییەکەیەوە زانیاری و داتای پێویست لەبارەی کار و چالاکی و رەوشی کارەبا بڵاودەکاتەوە. بۆیە هەر جۆرە هەوڵێک بۆ بەلاڕێدابردنی رای گشتی و پێدانی زانیاریی هەڵە لە بارەی دۆخی کارەبا، رێوشوێنی یاسایی دەرهەق ئەو کەس و لایەنانە دەگرنەبەر.
