وەفدی دەم پارتی لە ئیمڕاڵی گەڕانەوە و بڕیارە پاش کاتژمێرێکی دیکە ئەو پەیامەی پێیان دراوە بڵاوبکەنەوە.
ئاژانسی میزۆپۆتامیا بڵاویکردەوە، دوای گەڕانەوەی وەفدەکەی دەم پارتی لە ئیمڕاڵی لە پەخشی راستەوخۆدا پەیامەکەی عەبدوڵا ئۆجەلان دەخەنە روو.
ئاشکراشیکرد، پەیامەکە نووسراوە و ڤیدیۆیی نییە وەک ئەوەی چاوەڕێ دەکرا، بەڵام وێنەیەکی عەبدوڵا ئۆجەلان بڵاودەکەنەوە.
پەیامەکە بە زمانەکانی کوردی و تورکی دەخوێنرێنەوە و لە بەشێک لە شارەکانی باکوور و باشوور و رۆژئاوای کوردستان لە رێگای شاشەی گەورەوە دەگوێزرێنەوە.
لە ئێستادا لە زۆرینەی شارەکانی کوردستان هاوڵاتییان دەستیان کردووە بە گردبوونەوە لەو شوێنانەی شاشەکانی تێدا دانراوە و لە چاوەڕوانی خوێندنەوەی پەیامەکەدان.
چاوەڕێ دەکرێت پەیامەکەی عەبدوڵا ئۆجەلان بڕیار و راسپاردەی گرنگی سەبارەت بە ئایندەی حزبەکەی لەخۆبگرێت.
