پارێزگاری بانکی ناوەندیی عێراق رایدەگەیەنێت، بەنیازی دروستکردنی دراوێکی دیجیتاڵیی تایبەت بەو بانکەن بۆ جێگرەوەی دراوی کاغەز.
عەلی عەلاق، پارێزگاری بانکی ناوەندی لە نۆیەمین پێشانگە و کۆنفرانسی خزمەتگوزاریی دارایی و بانکی رایگەیاند، لەئێستادا پێشکەوتنێکی گەورە لە سیستمی پارەدانی ئەلیکترۆنی لە عێراقدا هەیە و سیستمی دارایی و بانکیی سەردەمییانەش وا دەخوازێت، پەرە بە مامەڵە دیجیتاڵییەکان بدرێت.
ئاماژەی بەوەشکرد، سیستەمی دارایی و بانکی رووبەڕووی دابەزینی دراوی کاغەزی دەبنەوە، بانکەکەش پلانی هەیە دراوی ئەلیکترۆنی دروستبکات بۆ ئەوەی لە مامەڵەکردندا جێگەی دیناری کاغەز بگرێتەوە.
دەشڵێت، پرۆسەکە وردە وردە دەستپێدەکات و ئێستا لە هەندێک لە بانکە ناوەندییەکانی جیهانیشدا، هەمان رێگە گیراوەتەبەر و سەرکەوتووش بووە.
