كەمێك لەمەوبەر، تەقینەوەیەك لە گۆڕەپانی تەحریر لە بەغداد ڕوویدا و بووەهۆی برینداربوونی دوو كەس.
بەپێی زانیارییەكان، تەقینەوەكە لەناو ئۆتۆمبێلێكدا ڕوویداوە كە باری هەڵگرتبوو، لەئەنجامدا دوو كەس برینداربوون كە یەكێكیان ژنێكە و گواستراونەتەوە بۆ نەخۆشخانە.
سەرچاوەیەكی ئەمنی بە میدیای عێراقی ڕاگەیاندووە، دوای تەقینەوەكە ئاگر كەوتووەتەوە و دووكەڵێكی گەورە لە شوێنەكە بەرزبووەتەوە.
تەقینەوەكە هاوكاتە لەگەڵ ئەو خۆپیشاندانەی ئەمڕۆ هەینی لە هەمان شوێن كە گۆڕەپانی تەحریرە ئەنجامدرا.
خۆپیشاندەران سەرباری داخستنی ڕێگەكان لەلایەن هێزە ئەمنییەكانەوە، خۆیان گەیاند بە گۆڕەپانی تەحریر و داوای دادگاییكردنی بكوژانی خۆپیشاندەرانی ئۆكتۆبەری 2019 و سزادانی گەندەڵكارانیان دەكرد.
