پارێزگاری کەرکوک رایدەگەیەنێت، دوورخستنەوەی یاریدەدەری پارێزگار بۆ کاروباری کارگێڕی و دارایی لەسەر داوای فراکسیۆنەکەی بووە.
رێبوار تەها پارێزگاری کەرکوک لە راگەیەندراوێکدا بڵاویکردەوە، ئیدارەی کەرکوک بەر لە چەند رۆژێک داواکارییەکی لەلایەن فراکسیۆنەکەی دکتۆر جەعفەر عەباس پێگەیشت کە تێیدا هاتبوو کۆتایی بە ئەرکی ناوبراو بهێندرێت کە پێشتر پێیسپێردرابوو، لەو بارەیەوە لەگەڵ فراکسیۆنەکە گفتوگۆکرا و رێکەوتین کە کۆتایی بە ئەرکی ناوبراو بهێندرێت و کەسێکی دیکە بۆ شوێنەکەی بپاڵێورێت.
ئاماژەی بەوەشکرد، ئیدارەی کەرکوک تەئكید دەکاتەوە کە بەردەوامە لە بەدیهێنانی هاوبەشی و چاندنی گیانی برایەتی و پێکەوە ژیانی ئاشتیانەی نێوان پێکهاتەکان.
جەختیشیکردەوە، ئیدارە و ئەنجومەنی پارێزگا جەخت لە هەڵوێستی نەگۆڕیان دەکەنەوە لە بونیاتنانەوەی کەرکوک سەرباری هەموو ئاڵەنگارییەکان و رێز لە ئیرادەی هێز و لایەنە سیاسیە هاوبەشەکانی دەگرێت.
