کەمال محەمەد، وەزیری سامانە سروشتییەکان بەوەکالەت رایدەگەیەنێت، بەربەست نەماوە و رەنگە پێش مانگی سێ، هەناردەکردنەوەی نەوت دەستپێبکاتەوە.
کەمال محەمەد لە لێدوانێکدا رایگەیاند، دوێنێ دووشەممە، سەرۆک کۆماری عێراق واژووی لەسەر هەمواری یاسای بودجە کرد و لەئێستادا هەموو رێکارە یاساییەکان بۆ هەناردەکردنەوەی نەوت تەواوبوون، ئەوەی ماوە، پێویستە لایەنی تورکیش ئامادەبێت.
وتیشی، ئێمە لە لایەنی هونەرییەوە هیچ کێشەیەکمان نییە و پێشبینی دەکەین تا کۆتایی مانگی سێ و رەنگە پێشتریش، هەناردەکردنەوەی نەوتی هەرێمی کوردستان دەستپێبکاتەوە.
کەمال محەمەد، کە هاوکات وەزیری کارەبای حکومەتی هەرێمیشە لە بەشێکی دیکەی قسەکانیدا ئاماژەی بەوەکرد، تاوەکو کۆتایی ساڵی 2026 کارەبا لە تەواوی هەرێمی کوردستان دەبێتە 24 کاتژمێری.
رۆژی 2ـی شوباتی ئەمساڵ، ئەنجومەنی نوێنەرانی عێراق هەمواری یاسای بودجەی پەسەندکرد و بەمپێیەش، لە رێگەی كۆمپانیای سۆمۆوە، جارێكی دیكە هەناردەی نەوتی هەرێم دەستپێدەكاتەوە.
