وەزارەتی ناوخۆی حکومەتی هەرێم ئاگادارییەکی بۆ کۆمپانیاکانی گەیاندنی خواردن (دێلیڤەری) بڵاوکردووەتەوە و دەڵێت، پێویستە جێبەجێبکرێن.
لە ئاگادارییەکەی وەزارەتی ناوخۆدا کە ئەمڕۆ پێنجشەممە 13/2/2025 دەرکراوە و واژۆی هێمن میرانی، بەڕێوەبەری گشتیی دیوانی وەزارەتەکەی لەسەرە، بە پێنج خاڵ، ئەو کۆمپانیایانە ئاگادارکراونەتەوە، کە ئەمانەن:
1- پابەندکردنی ماتۆڕسوارانی گەیاندنی خواردن بە تۆمارکردنی ماتۆڕەکانیان و دەرهێنانی مۆڵەتی ماتۆڕسواری لە ماوەی شەش مانگ لە دەرچوونی ئەم نووسراوە.
2- ئەو ماتۆڕسوارانەی لە ماوەی رابردوودا بێ تابلۆ و تۆمارکردن کاریانکردووە و سەرپێچییان کردووە، بەرپرسیاریەتی دەکەوێتە ئەستۆی کۆمپانیاکانیان، رەزامەندین لە ماوەیەک درێژتر نەبێت لە 31/12/2025، بە شێوەی ‘قیست’، سزا داراییەکان لە بەڕێوەبەرایەتیی هاتوچۆ یەکلایی بکەنەوە.
3- پێویستە کۆمپانیاکان پابەندبن بە رەخساندنی دەرفەتی کار بۆ هاوڵاتییانی هەرێمی کوردستان، هەر بیانییەکیش لەو کۆمپانیایانە کاربکات، پێویستە نشینگەی هەرێمی کوردستان، مۆڵەتی ماتۆڕسوارییان هەبێت و هیچ کارمەندێکیش نابێت پێشینەی تاوانی هەبێت.
4- بۆ رەچاوکردنی میزاجی هاوڵاتییان، پێویستە هەوڵبدرێت ماتۆڕی کارەبایی و بێدەنگ بۆ ناو شار بەکاربهێندرێت و بێزارکەر نەبن.
5- بۆ سەلامەتیی گیانی خۆیان، پێویستە ماتۆڕسوارەکان پابەندبن بە لەسەرکردنی کڵاو و پۆشینی جلوبەرگی تایبەت. هەروەها هەر کۆمپانیایەک پێویستە جلوبەرگی تایبەت بە خۆی هەبێت و ماتۆڕسوارەکانیش باجی تایبەتی خۆیان بە ناوی سیانی و کۆدی کارکردنی کۆمپانیاکەوە لە یەخەیان درابێت. هاوکات پێویستیشە ماتۆڕسواران پابەندی رێنمایی و یاساکانی لێخوڕینی سەلامەت بن و گیانی خۆیان و کەسانی دیکەش نەخەنە مەترسییەوە.
