دادگای باڵای فیدڕاڵیی عێراق سکاڵای دژی هەڵوەشاندنەوەی هەردوو وەزارەتی کاروباری شەهیدان و ئەنفالکراوان و ئەوقاف و کاروباری ئایینیی رەتکردەوە.
ئەمڕۆ سێشەممە، دادگای فیدڕاڵی بۆ تاوتوێکردنی 13 سکاڵا دانیشتنی ئەنجامدا و لەمیانیدا، دوو سکاڵای لەبارەی هەڵوەشاندنەوەی وەزارەتی شەهیدان و کاروباری ئەنفالکراوان و ئەوقاف و کاروباری ئایینی رەتکردەوە.
لە یەکێک لە سکاڵاکاندا داواکراوە وەزارەتى ئەوقاف و کاروبارى ئایینى هەڵبوەشێندرێتەوە، بەوپێیەى دژى پێنج ماددەى دەستوورى عێراقە و لە برى ئەو وەزارەتە، وەقف بۆ پێکهاتەکان دروستبکرێن، کە لە رووى کارگێڕی و داراییەوە سەربەخۆ بن و ببەسترێنەوە بە ئەنجومەنى وەزیرانەوە.
هاوکات لە سکاڵاکەى دیکەدا، داوا دەکرێت دادگاى باڵاى فیدراڵى وەزارەتى شەهیدان و کاروبارى ئەنفالکراوانى هەرێمى کوردستان بە نادەستوورى بزانێت، کە بەگوێرەى یاسای ژمارە 8ى ساڵى 2006 پێکهێنراوە. پەرلەمان و حکومەتى هەرێمى کوردستان ناچار بکرێن دەستەیەک بە ناوى دامەزراوەى شەهیدان پێکبهێنن، کە سەر بە ئەنجومەنى وەزیران بێت و لە رووى دارایی و کارگێڕییەوە سەربەخۆ بێت و یاسایەکى بۆ دەربکرێت.
