کارگەیەک و دوو کۆمپانیای سووتەمەنی لە سنووری عەربەت دران بە دادگا.
بەڕێوەبەرایەتیی پۆلیسی دارستان و ژینگەی سلێمانی لە راگەیەندراوێکدا بڵاویکردەوە، “بە تۆمەتی پیسبوونی ژینگە و بڵاوبوونەوەی بۆنی ناخۆش کارگەیەک و دوو کۆمپانیای سووتەمەنیی سنووری عەربەت رووبەڕووی یاسا کرانەوە”.
دەشڵێت، “ماوەیەکە بەهۆى ئەو بۆنەی کە لەهەوادا بڵاوبووەتەوە و بووە بە هۆی بێزارکردنی دانیشتووانى سنوورەکانی (قەزای هەڵەبجەی تازە) و ( ناحیەکانی عەربەت و زەڕایەن ) و دەوروبەریان و بەگشتى هاوڵاتییان سکاڵایان هەیە و نیگەرانن، هەربۆیە لەلایەن مەفرەزەکانى بنکەى پۆلیسى دارستانى عەربەت بەدواداچوون بۆ ئەو دۆسیەیە کرا و لە ئەنجامدا توانرا کارگەیەک و دوو کۆمپانیاى سووتەمەنى رووبەڕووى دادگا بکەنەوە”.
باس لەوەشدەکات، “ئێستا پەڕاوی لێکۆڵینەوەیان بۆ رێکخراوە لە بنکەی پۆلیسی دارستان و ژینگەی عەربەت بۆ وەرگرتنی رێکاری یاسایی و کێشەکە لەژێر لێکۆڵینەوەدایە”.
لە راگەیەندراوەکەدا هاتووە، “لەماوەی رابردوودا لەلایەن بنکەی پۆلیسی دارستانی عەربەت بەهەمان شێوە کارگەیەکی دیکەی سووتەمەنی روبەڕووی دادگا کرایەوە “.
