وەزارەتی خوێندنی باڵای هەرێم رایدەگەیەنێت، رۆژی یەكشەممە ئەنجامی زانكۆلاین ئاشكرادەكرێت.
وەزارەتى خوێندنى باڵا و توێژینەوەى زانستى رایگەیاند، رۆژى یەکشەممە 24ی ئەیلول لە کۆنگرەیەکى رۆژنامەوانیدا ئەنجامەکانى وەرگرتنى دەرچووانى دوانزەى ئامادەیی لە زانکۆ و پەیمانگەکان بۆ ساڵى نوێى خوێندنى (2023/ 2024) رادەگەیەنرێت.
دواى راگەیاندنى ئەنجامەکان لە رێکەوتى 1ی تشرینی یەكەم دەستدەکرێت بە پرۆسەى خوێندنى قۆناغى یەکەم لە زانکۆکان، وەك ئەوەی وەزارەتی خوێندنی باڵا دەیڵێت.
ئەوەشی خستەڕوو، پێویستە لەسەر وەرگیراوان لەدوای راگەیاندنی ئەنجامەکان، راستەوخۆ پەیوەندی بە زانکۆکانیان بکەن بۆ ئەم مەبەستەش زانکۆکانى کوردستان ئامادەکارى پێویست دەکەن بۆ پێشوازیکردن لە وەرگیراوان بۆ ساڵى نوێى خوێندنى (2023/ 2024).
