وەزارەتی سامانە سروشتییەكانی هەرێم رایدەگەیەنێت، گرێبەستەكانی نێوان وەزارەتەكە و كۆمپانیاكانی نەوت و غاز لە هەرێمی كوردستان كارایە و دروستە.
بەپێی روونكردنەوەیەكی وەزارەتی سامانە سروشتییەكان كە وێنەیەكی دەست تۆڕی میدیایی ئێستا كەوتووە و تێیدا هاتووە، دوای چەندین دانیشتنی دادگا و تانە لێدانی وەزارەتی سامانە سروشتییەكان لە بڕیارەكانی دادگای كەرخ كە دوابەدوای بڕیارەكانی دادگای باڵای فیدراڵیی عێراق دژ بە یاسای نەوت و گازی كوردستان دەرچووبوو، دادگای كەرخ دوای ماوەیەكی زۆر لەچەندینجار دادبینی لەبەرژەوەندیی وەزارەتی سامانە سروشتییەكان بڕیاری هەڵوەشانەوەی بڕیارەكانی پێشووی خۆیدا.
هەر لە روونكردنەوەكەی وەزارەتی سامانە سروشتییەكاندا هاتووە، هەرچەندە وەزارەتی نەوتی عێراقی دووبارە تانەی لە بڕیارەكاندا، بەڵام دادگای پێداچوونەوەی عێراق بڕیاری دایەوە بە پەسەندكردنی بڕیارەكانی دادگای تێهەڵچوونەوەی كەرخ، بەمەش لە ڕووی یاساییەوە یەكلابووەوە كە گرێبەستەكانی نێوان وەزارەتی سامانە سروشتییەكان و كۆمپانیاكانی نەوت و غاز لە هەرێمی كوردستان كارایە و دروستە.
